រលលកបោកច្រាំង លាន់សូរប្រាវៗ ទាំងកណ្តាលរាត្រី ។ យប់នេះខ្យល់ខ្លាំងគួរឲ្យរន្ធត់ជាពន់ពេក។ មាត់សមុទ្យ ដែលពេលថៃ្ងអូ៑អរ ពេញទៅដោយមនុស្សគួរសមនោះ ពេលនេះក្លាយជាស្ងាត់គួរឲ្យខ្លាច។ ម៉ោង ១២ កន្លះ រំលងអាធ្រាតទៅហើយសមនឹងនេះជាថ្ងៃធម្មតាផង មិនសូវមានអ្នកទេសចរណ៍ណាមកលេងទេ លុះដល់យប់ជ្រៅទៅកាន់តែស្ងាត់ជ្រងំ។ នៅក្រោមដើមដូងប្របមាត់សមុទ្យមួយដើម ប្រសិនណាជាយើងសំលឹងឲ្យយូរបន្តិច នោះយើងនឹងបានឃើញស្រមោលខ្មៅស្ទង់ៗជាក់ជាមិនខាន។ ពេលដែលយើងមើលយូរៗទើបយើងអាចដឹងបានថានេះជាស្រមោលមនុស្សប្រុសម្នាក់។ ដោយសារនេះជារាត្រីរនោច យើងមិនអាចដឹងពីភិនភាគបុរសអាថ៌កំបាំងនេះបានឡើយ។មួយសន្ទុះក្រោយមក គេក៏ដើរចេញពីទីនោះទៅ។ហេតុអ្វីក៏ពាក់កណ្តាលអាធ្រាត បែរជាមានមនុស្សចំលែកបង្ហាញខ្លួនទៅវិញ? គេនេះជានរណាដែរបានជាមកនៅទីនេះទាំងយប់ស្ងាត់ជ្រងំ?......................
បេនឡានក្រុងព្រះសីហនុ ថ្ងៃនេះមិនសូវមានមនុស្សទេ ព្រោះថ្ងៃប្រលងបាក់ឌុបជិតឈានចូលមកដល់ហើយ បាំងតែប្រហែល៣ អាទិត្រទៀតប៉ុណ្ណោះ។ ដូច្នេះគេមិនសូវមកដើរលេងទេ ដោយសារទុកពេលសិក្សា។ ហេតុនេះគេដូចជាមិនសូវឃើញយុវជនប្លែកមុខឡើយ។ ចុះពីរថយន្តក្រុងមកមង្គល ដែលហាក់ដូចជាមិនធ្លាប់នឹងការជិះឡានក្រុងនោះ ត្រូវអ្នកម៉ូតូឌុបប្រទាញប្រទង់ទៅមកទៅមក ដល់តែទ្រាំមិនបានគេក៏ហក់ឡើងម៉ូតូមួយ
ទៅ។ យើងសូមបើកវង់ក្រចកបរិយាយពី មង្គល បន្តិចសិន។ គេមាន អាយុ១៧ឆ្នាំ មានកំពស់ប្រហែល 170cm សម្បុរសជ្រះ រាងស្តើង សក់ស្លូតខ្មៅតែវែងបន្តិច ចិញ្ចើមក្រាស់ ច្រមុះស្រួច សរុបមកយើងអាចដឹងថា កំលោះនេះក៏មានលម្អគួរសមដែរ។ មង្គលជាបុត្រតែមួយរបស់លោកប្រសិដ្ឋ ម្ចាស់ជំនួញដ៏ធំ ។ ម្តាយរបស់គេលាចាកលោកជាយូរណាស់មកហើយ តាំងពីនាយទើបអាយុបាន៥ ឆ្នាំម្ល៉េះ។ លោកប្រសិដ្ឋស្រលាញ់គេណាស់ លោកមិនយកភរិយាថ្មីទេ ក៏មិនដែលនាំស្រីណាមកជាគំរូអាក្រក់ដល់កូនដែរ។ តែមង្គលប្រសប់តែងខ្លួនណាស់ គេពាក់អាវយឺតសាមញ្ញ ស្លៀកខោអាវធម្មតា មិនអាចឲ្យគេចាប់ភ្លឹកពីឋានៈបានឡើយ។
នៅតាមផ្លូវ ពូម៉ូតូឌុបជាមនុស្សរួសរាយ គាត់ក៏ចាប់សួរទៅមង្គល :
- អឺ ក្មួយចង់ទៅណាដែរ?
មង្គលអេះអុញព្រោះគេឡើងម៉ូតូនេះដោយប្រថុចញុចពេក មិនបានប្រាប់ពូម៉ូតូឌុបពីគោលដៅដែលត្រូវទៅ។ កំលោះអេះក្បាលនិយាយ
- អឺ.... ទៅរកផ្ទះសំណាក់ណាដែលនៅជិតឆ្នេរសមុទ្រណាពូ
- ជិតឆ្នេរមានច្រើនណាស់ ក្មួយចង់បានប្រភេទណាដែរ?
- ប្រភេទណា? ពូចង់និយាយពីអី?
- ពូចង់បាននយ័ថា ក្មួយចង់រកអាធុនល្អ កណ្តាល រឺ ក៏អន់ៗ ? មើលទៅក្មួយមិនសូវមានលុយទេ ទៅរកអាអន់ៗទៅវាសមសម្រាប់ឋានៈដូចយើងណា។ ពូនិយាយនេះ មិនមែនមើលងាយក្មួយទេ គ្រាន់តែពូគិតថាក្មួយមានរូបរាងដូចជាសិស្សសាលា មិនសូវមានលុយ យកល្អកុំបង្ហិនលុយដោយសារកន្លែងដេកអី។ ពូឃើញច្រើនមកហើយ អ្នកដែលមកហើយចាយមិនថាំ ដល់ទៅវិញ ត្រូវជឿថ្លៃឡានគេ មើលទៅវេទនាណាស់។
មាណពសែនអស់សំណើចនឹងសំដីរបស់ពូម៉ូតូឌុប គាត់ជាមនុស្សនិយាយត្រង់គួរឲ្យចូលចិត្ត។ មង្គល ញញឹមបញ្ចេញស្នាមខួចស្រស់ អមជាមួយសំដី
- អរគុណហើយពូ ដែលបានប្រាប់! ប៉ុន្តែពូទៅរកកន្លែងណាល្អបន្តិចទៅណា ព្រោះខ្ញុំមិនសូវចេះនៅកន្លែងគគ្រិចប៉ុន្មានទេ...
- តែ....
- កុំបារម្ភរឿងលុយអីពូ...យ៉ាងហោចក៏ខ្ញុំមានលុយឲ្យថ្លៃម៉ូតូឌុបដែរ។
អ្នកទាំងពីរសើចព្រមគ្នា។ ពូម៉ូតូឌុបនិយាយ
- ក្មួយនៅក្មេងណាស់មើលទៅ! ក្មួយអាយុប៉ុន្មានហើយ?
- បាទ ១៧ ឆ្នាំហើយ។
- យី! ទើបតែ ១៧ឆ្នាំទេ!!!! ចុះក្មួយមកម្នាក់ឯងទេរឺ?
- បាទ មកតែម្នាក់ឯងទេ។
- ចំជាហ៊ានមែន! នែក្មួយ ពូប្រាប់យកតែបុណ្យទេណា សព្វថ្ងៃហ្នឹង ចោច្រើនណាស់។ ពួកអាក្មេងស្ទាវៗគេចសាលា វាដើរបង្ករចលាចលណាស់ ក្មួយឯងមកតែម្នាក់ឯងអញ្ចឹង ចេះប្រយត្ន័ប្រយែងផង។ រួចចុះក្មួយមកធ្វើអីដែរ?
- មកលំហែរ ដូចតែអ្នកឯទៀតដែរ។
- ក្មេងៗដូចក្មួយ ពូឃើញច្រើនតែមកដើម្បីរកការងារធ្វើ
- អូហ៍ ប្រហែលភាគច្រើនគេមកអញ្ចឹងមែន តែខ្ញុំមកដើម្បីតែលំហែរប៉ុណ្ណោះ។
- ក្មួយរៀនថ្នាក់ទីប៉ុន្មាន? រឺ ក៏ឈប់រៀនហើយ?
- ខ្ញុំរៀនថ្នាក់ទី ១២
- អ្ហាក៍! ក្រែងគេជិតប្រលងហើយ
(និពន្ធដោយ : ស្រេង រតនា)